វិធីព្យាបាលជម្ងឺក្រាចេក

វិធី​ព្យាបាល​ជំងឺ​ ក្រា​ ចេក​ និង​ កំចាត់​ ក្រា​ចេក​
ពាក្យ​ ក្រា​ នេះ​ ខ្មែរ​យើង​ប្រើ​​ទូលំទូលាយ​ពេក​ ជា​មូលហេតុ​ធ្វើ​ឲ្យ​គាត់​ ពិបាក​កំណត់ជំងឺ​ និង​ ព្យាបាល។​ តាម​ពិត​បើ​យើង​បែងចែក​អោយ​បាន​ច្បាស់លាស់​ នោះ​មិន​ពិបាក​ព្យាបាល​ទេ​ គឺបែងចែក​ជា​១០យ៉ាង​ដូច​ខាងក្រោម​នេះ​ ៖
១​)​ ក្រាទឹក
បណ្ដាល​មក​ពី​ ជាំ​ទឹក​ ឬ​ដី​បៀម​ទឹក​ជ្រុល​
ដំណោះស្រាយ​ ធ្វើ​អោយ​បាត់​ជាំ​ទឹក​ កាយ​ប្រឡាយ​ ប្រព័ន្ធ​បង្ហូរ​ជាដើម​។

២)​ ក្រាស្ងួត
មក​ពី​ខ្វះ​ទឹក​ ដែល​ដើម​ចេក​ មិន​អាច​បំលែង​ជីវជាតិ​ពី​ដី​ តាម​រយៈ​ទឹក​ និង​​ខ្វះ​ទឹក​ចិញ្ចឹម​ខ្លួន​ឯង​។​ ដូច្នេះ​ ប្រព័ន្ធ​ទឹក​ ត្រូវ​រៀប​ចំ​ ប្រព័ន្ធ​ទឹក​ តំណក់​ទឹក​ ឬ​ កូន​ប្រឡាយ​ទឹក​ អោយ​មាន​សំណើម​សមស្រប​ នឹង​ដំណាំ​ចេក​ ក្នុង​កំរិត​សំណើម​ ពី​ ២០០០មីលីលីត្រ​ ទៅ​ ២៥០០មីលីលីត្រ​ ក្នង​ដី​មួយ​ម៉ែត្រ​គីប​ ក្នុង​មួយ​ឆ្នាំ​។

៣)​ ក្រា​បណ្ដាល​មក​ពី​ខ្វះ​ ជីវជាតិ​ NPK
ប្រើ​ជី​ NPK  ឬ​ DAP  ឬ​ អ៊ុយរេ​ និង​ដាក់​ជី​កំប៉ុស្ត៍​ អោយ​បាន​ច្រើន​ ជារៀង​រាល់​ ៣ខែ​ម្ដង​ កាន់​តែ​ល្អ។

៤)​ ក្រា​បណ្ដាល​មក​ពី​ខ្វះ​សារជាតិ​ ចិញ្ចឹម​ ទាំង​ ១១យ៉ាង
ដូច​ជា​
សង្កសី​
ទង់ដែង​
ម៉ង់កាណែស​
ម៉ាញេស្យូម​
បូរ៉ន​
ដែក​
ស្ពាន់​ធ័រ​
អាស៊ូត
ផូស្វាត​
ប៉ូតាស្យូម​
និង​ សូដ្យូម
ដំណោះស្រាយ​លើ​បញ្ហា​នេះ​ អាច​ប្រើ​ប្រាស់​ MicroX បាញ់​លើ​ចេក​ និង​ ជី​ NPK​ ឬ​ កំប៉ុស្ត៍​ ឬ​ DAP។

៥)​ ក្រា​ ដែល​ បណ្ដាល​មក​ពី​ដី​ឡើង​ជាតិ​អាសុីត​ខ្លាំង​ពេក
ដំណោះស្រាយ​គឺ​ ដាក់​ជី​កំប៉ុស្ត៍​ នោះ​នឹង​កាត់​បន្ថយ​ជាតិ​អាសុីត​ និង​ បាច​កំបោរ​ស​ ឬ​ អំបិល​ នោះ​នឹង​ជួយ​កាត់​បន្ថយ​ជាតិ​អាសុីត​ បាន​ខ្លះ​ដែរ។​ ឬ​ក៏​ដឹក​ ដី​ឥដ្ឋ​ ឬដី​បាត​បឹង​ យក​ទៅ​ចាក់​ជុំ​វិញ​គល់​ចេក​ និង​ តាម​ចន្លោះ​រង​ ចេក​ អោយ​បាន​ច្រើន​។

៦)​ ក្រា​ បណ្ដាល​មក​ពី​សត្វ​ល្អិត​ បំផ្លាញ​
ប្រភេទ​ដង្កូវ​ដួង​ និង​ សត្វ​ល្អិត​ផ្សេង​ៗ​
សុី​ក្តិល​ សុី​បណ្តូល​ ជា​ដើម​។

ដំណោះស្រាយ​ ប្រើ​ថ្នាំ​សម្លាប់​សត្វ​ល្អិត​
នឹង​ បាច​កំបោរ​ស​ ឬ​ អំបិល​ នៅ​ជុំ​វិញ​គល់​។

៧)​ ក្រា​ចេក​ ដែល​បណ្ដាល​មក​ពី​​ស្អុយ​បណ្តូល​ ក៏​ធ្វើ​អោយ​ចេក​ក្រា​ដែរ។
ដំណោះស្រាយ​ ត្រូវ​គាស់​ដើម​នោះ​ចោល​ ចៀសវាង​ចម្លង​ទៅ​ដើម​ផ្សេង​ទៀត​។

៨)​ ក្រា​ដែល​បណ្ដាល​មក​ពី​ បញ្ហា​ ដាំ​ចេក​ ទុក​កូន​ច្រើន​ដើម​ក្នុង​មួយ​គុម្ព​ ក៏​ធ្វើ​អោយ​ចេក​ ឆាប់​ឡើង​ក្រា​ ព្រោះ​ខ្វះ​ជីវជាតិ​ ខ្វះ​ សារជាតិ​ចិញ្ចឹម​ និង​ខ្វះ​ NPK សម្រាប់​ដើម​ចេក​និមួយៗ​ ព្រោះ​ចង្អៀត​ពេក​ ដណ្ដើម​ជីវជាតិ​គ្នា​សុី។
ដំណោះស្រាយ​ ដូច្នេះ​ត្រូវ​ងាក​មក​ដាំ​ខ្នាត​ ២​ គុណ​ នឹង​ ២​ រួច​ទុក​កូន​តែ​មួយ​ដើម​ ក្នុង​មួយ​គុម្ព​វិញ។

៩)​ ក្រា​ដែល​បណ្ដាល​មក​ពី​ បញ្ហា​ ប្រើ​ថ្នាំ​ កំចាត់​ស្មៅ​ ជ្រាប​ ៤៨​ ក៏​ធ្វើ​អោយ​ក្រា​ដែរ​ និង​ ការ​ដុត​ភ្លើង​ក្នុង​ចំការ​ចេក​ ក៏​ធ្វើ​អោយ​ ចេក​ក្រា​ដែរ​។
ដំណោះស្រាយ​ ហាម​ប្រើ​ថ្នាំ​បាញ់​ស្មៅ​ ក្នុង​ចំការ​ចេក​ និង​ ហាម​ដុត​ភ្លើង​ ដោយ​ងាក​មក​ប្រើ​ កូន​ត្រាក់ទ័រ​តូច​ បំពាក់​ក្បាល​កាត់​ស្មៅ​ កាត់​វិញ​ ទើប​ទាន់​ពេលវេលា​ និង​ ធ្វើ​អោយ​ចេក​មាន​សុខភាព​ល្អ​ទៀត​ផង​។​ ជា​ពិសេស​នៅ​ពេល​ដែល​ ដើម​ចេក​ធំ​ វា​នឹង​គ្រប​ស្មៅ​វិញ​ ឈ្នះ​លើ​ស្មៅ​ ហើយ​ជាន់​ស្មៅ​វិញ​។

១០)​ ដី​ដាំ​ចេក​ ដែល​នៅ​ខាង​ក្រោម​ មាន​ថ្ម​កំបោរ​ស​សុទ្ធ​នៅ​ ខាង​ក្រោម​ ក្នុង​ជម្រៅ​ត្រឹម​តែ​ ២​ទៅ​៣តឹក​ ក៏​ធ្វើ​អោយ​ក្រា​ដែរ។
ដំណោះស្រាយ​ ហាម​ដាំ​ចេក​ លើ​ដី​កំបោរ​ស​ ដោយ​ដាំ​លើ​ដី​ ក្រហម​ខ្លាញ់​ក្តាម​ ដី​ខ្មៅ​ ដី​លឿង​ ឬ​ ដី​ល្បាប់​ ដែល​មាន​ដង្ហើម​ទឹក​រាក់​ តែ​ជា​ដី​មិន​លិច​ទឹក​ ហើយ​ដែល​មិន​មាន​ថ្ម​កំបោរ​ស​នៅ​ខាង​ក្រោម​វិញ​។​ ឬ​ក៏​អាច​ដាំ​លើ​ដី​ដែល​មាន​ថ្ម​កំបោរ​ស​ដែរ​ តែ​ ថ្ម​កំបោរ​ស​ ត្រូវ​មាន​ជម្រៅ​ជ្រៅ​ជាង​ ២ម៉ែត្រ​ចុះ​ទៅ​ ពី​ដី​ស្រទាប់​ល្អ​ ខាង​លើ​។

ក៏​អាច​មាន​ដែរ​ បញ្ហា​ក្រា​ ដែល​បណ្ដាល​មក​ពី​ រោគ​ផ្សិត​ ។​ មេ​រោគ​ផ្សិត​ ច្រើន​វាយ​ប្រហារ​លើ​ដំណាំ​ផ្សេង​ ច្រើន​ជាង​ចេក​។​ តែ​ខ្ញុំ​រក​វិធី​សាមញ្ញ​ អោយ​ប្រជាពលរដ្ឋ​ងាយស្រួល​យល់​ ព្រោះ​ពាក្យ​ក្រា​ចេក​ ហ្នឹង​ អោយ​តែ​គាត់​ឃើញ​ក្រហម​ គាត់​ថា​ក្រា​ហើយ​។​ ហើយ​បញ្ហា​ផ្សិត​ច្រើន​បណ្ដាល​មក​ពី​ ការ​ប្រែប្រួល​អាកាសធាតុ​លឿន​ពេក​ រវាង​ក្តៅ​ខ្លាំង​ និង​ ភ្លៀង​ធ្លាក់​ខ្លាំង​ បញ្ហា​ខាង​លើ​ក៏​ឆ្លុះបញ្ចាំង​ពី​ បញ្ហា​ដែល​កសិករ​ជួប​ជាក់ស្ដែង​។
ដំណោះស្រាយ​បញ្ហា​នេះ​ ត្រូវ​បាញ់​ថ្នាំ​ ប្រភេទ​ដូច​ខាងក្រោម​ ទៅ​លើ​ កូន​ចេក​ ដូចជា​

-Mancozeb (Dithane F-45 Rainshield) លេខ​កូដ​ EPA# 62719-396
ជា​ប្រភេទ​ទឹក​ សម្រាប់​ព្យាបាល​ជំងឺ​ ផ្សិត​ ជំងឺ​រលាក​ ជំងឺ​រលួយ​ និង​ជំងឺ​ពុក​ដើម​ពុក​មែក​
កំរិត​ប្រើ​ក្នុង​មួយ​លើក​ ចាប់​ពី​ ១លីត្រ​ រហូត​ដល់​ ៣លីត្រ​ ក្នុង​មួយ​ហិចតា​ មាន​ប្រសិទ្ធភាព​ រយៈពេល​ ៦៦ថ្ងៃ​ ។ អាច​បាញ់​ក្នុង​មួយ​រដូវកាល​ ៦ដង​។
ហាម​ប្រើ​អោយ​លើស​ពី​ ១៨លីត្រ​ ក្នុង​មួយ​រដូវកាល​។

-Manzate Pro-Stick Funicide 30 lbs លេខ​កូដ​ EPA# 70506-234
ជា​ប្រភេទ​ម្សៅ​ សម្រាប់​ព្យាបាល​ជំងឺ​ ផ្សិត​ ជំងឺ​រលាក​ ជំងឺ​រលួយ​ និង​ជំងឺ​ពុក​ដើម​ពុក​មែក​
កំរិត​ប្រើ​ក្នុង​មួយ​លើក​ ចាប់​​ពី​ 0,7kg​ រហូត​ដល់​ 1,8kg​ ក្នុង​មួយ​ហិចតា​ មាន​ប្រសិទ្ធភាព​ រយៈពេល​ ៦៦ថ្ងៃ​ ។  អាច​បាញ់​ក្នុង​មួយ​រដូវកាល​ ៦ដង​។
ហាម​ប្រើ​អោយ​លើស​ពី​ ​ 10,9kg ក្នុង​មួយ​រដូវកាល​។

-Manozete Pro-Stick Fungicide 6 lbs លេខ​កូដ​ EPA# 70506-234
ជា​ប្រភេទ​ម្សៅ​ សម្រាប់​ព្យាបាល​ជំងឺ​ ផ្សិត​ ជំងឺ​រលាក​ ជំងឺ​រលួយ​ និង​ជំងឺ​ពុក​ដើម​ពុក​មែក​
កំរិត​ប្រើ​ក្នុង​មួយ​លើក​ ចាប់​​ពី​ 0,7kg​ រហូត​ដល់​ 1,8kg​ ក្នុង​មួយ​ហិចតា​ មាន​ប្រសិទ្ធភាព​ រយៈពេល​ ៦៦ថ្ងៃ​ ។  អាច​បាញ់​ក្នុង​មួយ​រដូវកាល​ ៦ដង​។
ហាម​ប្រើ​អោយ​លើស​ពី​ ​ 10,9kg ក្នុង​មួយ​រដូវកាល​។
បញ្ជាក់​ ថ្នាំ​ប៉ុន្មាន​មុខ​នេះ​ ប្រើ​តែ​មួយ​មុខ​ទេ​ មួយ​ណា​ក៏​បាន​។​ ឬក៏​ប្រើ​វិធី​សាមញ្ញ​មួយ​ទៀត​ ដោយ​គ្រាតែ​យក​ ក្រូចឆ្មារ​ លាយ​នឹង​សាប៊ូ​លាង​ចាន​ លាយ​ក្នង​ធុង​ទឹក​ ហើយ​បាញ់​ទៅ​លើ​កូន​ចេក​ រៀងរាល់​ ៣ខែ​ម្ដង​។

ចំណុច​តូច​មួយ​ទៀត​ គឺ​បណ្តាល​មក​ពី​ ម្ចាស់​ចំការ​ មិន​បាន​តែង​ដើម​ ដោយ​កាត់​មែក​ធាងចេក​ ដែល​មាន​ជំងឺ​ចេញ​។
ប្រភព: ( កសិកម្ម ឧស្សាហកម្ម និង សិប្បកម្ម )